Syniadau Gwyliau’r Pasg
Os ydych chi’r un peth â ni, rydych chi’n edrych ymlaen at seibiant byr dros y Pasg, ac yr ydym ni eisiau rhannu rhai syniadau o ran gweithgareddau gyda chi. Mae mwyafrif ein hatyniadau ni’n agor ar gyfer gwyliau’r Pasg, felly bydd digon o bethau i chi eu gwneud. Os ydych chi eisiau gwneud mwy na bwyta wyau Pasg, yna Gogledd Ddwyrain Cymru yw’r lle delfrydol i chi dreulio’r gwyliau. Fodd bynnag, os ydych chi’n dod â phlant neu os ydych chi fel plentyn eich hun, bydd digon o helfeydd wyau Pasg a digwyddiadau ar thema’r Pasg yn ein hatyniadau.
Cewch eich siomi ar yr ochr orau gan dywydd y gwanwyn yng Ngogledd Ddwyrain Cymru. Mae’r dyddiau’n oleuach ac yn hirach – felly cewch wneud y gorau o’ch cyfnod yma. Wrth i’r tywydd gynhesu, nid yw gweithgareddau awyr agored mor heriol, a chofiwch, os cewch chi ambell i gawod o law, ein hoff ddywediad ni yw ‘Nid oes y fath beth â thywydd gwael, dim ond y dillad anghywir!’
Dyma rywfaint o’n hoff atyniadau ni i deuluoedd.
Carchar Rhuthun ydi un o’r adeiladau mwyaf trawiadol yng Ngogledd Cymru a’r unig garchar yn null Pentonville a adeiladwyd yn bwrpasol, sydd ar agor i’r cyhoedd fel atyniad treftadaeth. Ers yr ail-agoriad ym mis Mai 2002, ar ôl gwaith adfer gwerth dwy filiwn o bunnoedd, gall pobl sbïo i mewn i bob twll a chornel a dysgu am fywyd tu mewn i system carchardai oes Fictoria. Dewch i weld sut roedd y carcharorion yn byw o ddydd i ddydd: beth gawsant i fwyta, pa waith a wnaethant a pha gosbau a ddioddefwyd ganddynt. Archwiliwch y celloedd yn cynnwys y gell gosbi, y gell’dywyll’ a’r gell gondemniad. Dysgwch am ‘Houdini’ Cymru, a William Hughes, y person olaf i’w grogi yno. Mae nhw yn croesawu cŵn.
Pwll Brickfield , Rhyl
Mae rhaeadr Dyserth, lle mae Afon Ffyddion yn syrthio 70 troedfedd ar ei thaith i Afon Clwyd, mewn pentref bychan ar gyrion y Rhyl. Yn ôl y sôn, yr oedd olwyn ddŵr anferthol y tu mewn i’r waliau canoloesol, a oedd yn cael ei rhedeg gan Raeadr Dyserth, a chodwyd sawl melin ar hyd yr afon yn ystod y blynyddoedd wedi hynny.
Rhaeadr Dyserth
Mae rhaeadr Dyserth, lle mae Afon Ffyddion yn syrthio 70 troedfedd ar ei thaith i Afon Clwyd, mewn pentref bychan ar gyrion y Rhyl. Yn ôl y sôn, yr oedd olwyn ddŵr anferthol y tu mewn i’r waliau canoloesol, a oedd yn cael ei rhedeg gan Raeadr Dyserth, a chodwyd sawl melin ar hyd yr afon yn ystod y blynyddoedd wedi hynny.
Rheilffordd Fach y Rhyl
Rheilffordd fach hynaf Prydain – teithiau trên o amgylch Marine Lake ers 1911. Amgueddfa gyda sgrin gyffwrdd ryngweithiol, siop anrhegion a thoiledau.
Castell Dinbych
Adeiladwyd Castell Dinbych a waliau’r dref rhwng 1282 a 1311. Adeiladwyd y castell i Henry de Lacy, Iarll Lincoln a gafodd arglwyddiaeth Dinbych gan y brenin Edward y 1af yn ystod ei ymgyrch yn erbyn y Cymry.
Mae’r castell sydd bellach yng ngofal CADW ar agor drwy gydol y flwyddyn, ond mae’r amseroedd a’r dyddiau’n amrywio drwy’r flwyddyn. Mae canolfan i ymwelwyr ar y safle ac mae lleoedd parcio ar gael. Gallwch chi hefyd fenthyg allwedd gan Lyfrgell Dinbych i grwydro waliau’r Castell ar eich pen eich hun.
Cwch Camlas wedi’i dynnu gan Geffyl
O Lanfa Llangollen, gallwch chi fynd ar daith mewn cwch wedi’i dynnu gan geffyl neu ar daith mewn cwch modur ar y draphont ddŵr. Mae’r ddau yn eich tywys chi ar hyd golygfeydd a synau hudolus Camlas hardd Llangollen.
Llyn Brenig
Archwiliwch dros 2500 erw o goedwigoedd, rhostir a llynnoedd ymhlith golygfeydd godidog o’r ucheldir, ynghyd â Chanolfan Ymwelwyr, Caffi, Siop Anrhegion, Arddangosfa’r Gweilch, Maes Chwarae Antur, Llogi Beiciau, Beicio Mynydd, Llwybrau Cerdded, Hwylio a physgota o safon ryngwladol i daro arnynt.
Tŷ Nantclwyd y Dre a Gerddi’r Arglwydd
Tŷ Pren o’r 15fed Ganrif a gerddi muriog wedi’u hadfer yn dyddio o’r oesoedd Canol. Mae un o dai tref pren a gerddi muriog hynaf Cymru wedi’i adfer i adlewyrchu 7 cyfnod o’i hanes a’i ddatblygiad. Gall ymwelwyr fynd yn ôl mewn amser o’r 1940au i 1435
Yn yr ardd mae pergola rhosod, coed cnau ac mae’r ‘dolydd blodau’ yn dangos defnydd hanesyddol y gerddi – ar gyfer meddyginiaeth, coginio a phleser synhwyraidd. Mae’r berllan yn cynnwys mathau traddodiadol o afalau a gellyg ac eirin Dinbych. Ar hyd y llwybrau ceir llwyni ffrwythau, meryswydd, cwins a mwyar Mair, arddangosfa wych o babi gwyllt a ‘mynwent anifeiliaid anwes’ heb ei chyffwrdd. Gallwch chi fwynhau golygfeydd unigryw o’r dref hanesyddol, y castell a’r bryniau o’ch cwmpas o safle uwch a chudd y gerddi.
Plas Newydd, Llangollen
Roedd y Foneddiges Eleanor Butler a Miss Sarah Ponsonby wedi dal dychymyg y gymdeithas Raglywiaeth. Cawsant lu o ymwelwyr i’r bwthyn bach diymhongar, y gwnaethon nhw ei drawsnewid dros y blynyddoedd i ffantasi Gothig o wydr wedi’i staenio a derw wedi’i gerfio’n fanwl. Y tu mewn i Blas Newydd heddiw, ceir arddangosfa yn cynnwys rhai o’u heiddo nhw a thaith sain sy’n dod â’u stori nhw’n fyw. Gallwch grwydro drwy eu gerddi ac ar hyd eu llwybr ar lan yr afon. Gallwch chi hefyd gael paned o de yn eu hystafelloedd te hyfryd fel y gwnaeth Wordsworth, Syr Walter Scott a Dug Wellington o’ch blaen.
Rheilffordd Llangollen a Chorwen
Mae trenau wedi dychwelyd i Ddyffryn Dyfrdwy. Trwy gydol mis Ebrill, byddant yn rhedeg amserlen ‘A’ ar ddydd Mercher a phob penwythnos gyda stêm, diesel neu railcars ar waith.
Beth am fwynhau taith allan i weld y dyffryn hardd. Gellir archebu tocynnau ymlaen llaw ar-lein neu eu prynu ar y diwrnod.
I gael rhagor o wybodaeth am ddigwyddiadau sy’n cael eu cynnal trwy gydol 2025, ewch i’w tudalen Digwyddiadau.
I gael rhagor o syniadau o ran gweithgareddau dros y Pasg, ewch i’n hadran ddigwyddiadau ar ein gwefan. Felly, peidiwch ag oedi!